KCG компаниясы Атырау облысындағы Қашаған кен орнында газ өңдеу зауытының құрылысын жалғастыруда. Нысанда бір мезетте жер жұмыстары, бетон құю, электр-монтаждау жұмыстары, технологиялық жабдықтарды, металл конструкцияларын және инженерлік желілерді орнату жұмыстары қатар жүргізілуде.

Бүгінгі таңда топырақ қазу жұмыстарының көлемі 1,135 млн текше метрді құрап, жобалық көрсеткіштің 79,7%-ына жетті. Кері топырақ көму жұмыстары 62,6%-ға орындалып, 1,69 млн текше метрден астам топырақ төселді. Бетон жұмыстарының орындалу деңгейі 74,1%-ды құрап, жалпы көлемі 62 мың текше метрден асты.

Негізгі технологиялық жабдықтарды монтаждау жұмыстары жалғасуда. Қазіргі таңда 5 284 тонна жабдық орнатылып, жоспарланған көлемнің 52,6%-ы орындалды. Металл конструкцияларын монтаждау жұмыстары 57,4%-ға аяқталып, 11,8 мың тонна конструкция орнатылды. Резервуарлық паркінің дайындығы 92,6%-ға жетті.

Сонымен қатар инженерлік инфрақұрылым құрылысы да қатар жүргізілуде. Жерасты құбырларын монтаждау жұмыстары 57,6%-ға орындалып, 28,4 мың метр инженерлік желі тартылды. Сәулеттік жұмыстар аясында 8 мың шаршы метрден астам сэндвич-панельдер мен профнастил орнатылды. Электр-монтаждау бағыты бойынша 35 мың метрге жуық кабель өнімдері төселді.

Қазіргі уақытта жобаның барлық негізгі өндірістік учаскелерінде жұмыстар жалғасуда. Осы кезеңдегі басты міндеттер — аса маңызды құрылыс-монтаж жұмыстарын аяқтау, электр-монтаж жұмыстарының көлемін арттыру және жабдықтар мен материалдарды кестеге сәйкес жеткізуді жалғастыру.

Қашағандағы газ өңдеу зауытының құрылысы өңірдегі ең ірі өнеркәсіптік жобалардың бірі болып қала береді.