2025 жылғы 27-28 мамырда Бейжіңдегі ChinaOil HBP Science & Technology Co., Ltd бас кеңсесінде «QazaqGaz» ҰК» АҚ, «Kazakh Construction Group» ЖШС, «Integra Construction KZ» ЖШС және ChinaOil HBP өкілдерінің Қазақстанның Атырау облысындағы Қашаған кен орнында газ өңдеу зауытын салу жобасының барысына арналған жұмыс кездесуі өтті.

Отырысқа, атап айтқанда: Мейірбек Ихсанов – «QazaqGaz» ҰК» АҚ басқарма төрағасының бірінші орынбасары, Құдрет Шамиев – «Integra Construction KZ» ЖШС бақылау кеңесінің төрағасы, Данияр Рахымтаев – «Integra Construction KZ» ЖШС бас директоры, Нұрлан Жалбиров – «Kazakh Construction KZ» ЖШС бас директоры, Лю Цзянь - ChinaOil HBP тобының тәуелсіз басқарма мүшесі, Лу Вэй - China Oil HBP Group бас директоры, Чжоу Сюэшеш – бас менеджердің орынбасары, Гао Чуанлин – China Oil HBP Central Asia бас директорының орынбасары қатысты.

Қатысушылар іске қосу жұмыстарын үйлестіру, технологиялық жабдықты орнатуды бақылау, сондай-ақ өндіріс орындарын пайдалану бойынша қазақстандық мамандарды оқытуды ұйымдастыру мәселелерін талқылады. Іске асырудың барлық кезеңдерінде мерзімдер мен сапаның сақталуына ерекше назар аударылды.

Кездесу қорытындысы бойынша тараптар үшжақты хаттамаға қол қойды, онда қол жеткізілген уағдаластықтар мен жоба бойынша алдағы қадамдар көрсетілген.

Қашағандағы газ өңдеу зауыты консорциум аясында жүзеге асырылуда, оның құрамына:
• «Kazakh Construction Group» ЖШС — консорциумның жетекшісі, құрылыс-монтаждау жұмыстарын орындау;
• ChinaOil HBP Science & Technology Co., Ltd — газды тазарту технологиясы және жабдықты жеткізу;
• «Промстройпроект» ЖШС — жобалау.

Жобаның тапсырысшысы – «QazaqGaz» ҰК АҚ.
Атырау облысында зауытты іске асырудың стратегиялық маңызы бар: жоба ұлттық газ инфрақұрылымын дамытуға, шикізатты өңдеу тиімділігін арттыруға және заманауи технологиялық шешімдерді енгізуге бағытталған.